Əgər hədislərə nəzər salsaq, görərik ki, Seyyidi-şühəda (ə) o dahi şəxsiyyətlərdəndir ki, Həzrət Adəmdən (ə) tutmuş Həzrət Xatəmə (s) qədər hamı ona xüsusi diqqət göstərmişdilər. Bu dahi insan hələ dünyaya gəlməmişdən qabaq onun müsibəti yada salınıb, göz yaşı tökülmüşdür.

İmam (ə) şəhid olan zaman hədislərimizin buyurduğuna görə nəinki insanlar, hətta mələklər, cinlər, yer və göy Həzrətin (ə) müsibəti üçün göz yaşı tökmüşdür.

Belə ki, Aşura ziyarətində oxuyuruq: "Ey Əba Abdullah! Sənin müsibət və qəmin bizim üçün və bütün yer və göy əhli üçün böyük və ağırdır".

Hər bir insanın İmam Hüseynə (ə) diqqət etməsi onun əməl və ibadətlərinə təsir qoyar, qəlb və bədən üzvlərində nuraniyyət meydana gələr və bu insanın əməlində özünü büruzə verər. Onun üçün behiştdə xüsusi məqam və dərəcələr olar.

Həzrət Adəm (ə) o zaman ki, İmam Hüseynin (ə) adını çəkərdi, özündən asılı olmadan göz yaşları və qəhər onu boğardı və bunun səbəbini Allahdan soruşur. Cəbrayil (ə) nazil olur və İmam Hüseynin (ə) necə qətl olacağını ona danışır. Həzrət Adəm (ə) onun qatilinin adını soruşur və onu lənətləyib, bu müsibət üçün göz yaşı tökür.

Nuhun (ə) gəmisi İmamın (ə) şəhid olacağı yerə çatan zaman tufan qalxır və Nuh (ə) elə bilir ki, gəmi qərq olacaqdır. Allaha üz çevirib dua edir və Cəbrayil (ə) nazil olur və ona həmin yerin İmam Hüseynin (ə) qətl olacağı məkan olduğunu söyləyir və müsibəti nəql edir. Gəmidə olanlar və Həzrət Nuh (ə) İmam (ə) üçün göz yaşı tökür və düşmənlərini lənətləyirlər.

Həzrət İbrahim (ə) Kərbəla torpağından keçən zaman atı onu yerə atır və peyğəmbərin başı yarılır. Allaha dua edir və bu zaman Cəbrayil (ə) nazil olur və həmin yerin İmam Hüseynin (ə) şəhid olacağı yer olduğunu xəbər verir və deyir ki, sənin qanının bu torpağa tökülməsi sənin o Həzrətlə (ə) həmrəy olmağının nişanəsidir. İbrahim (ə) də İmamın (ə) qatillərini lənətləyir.

Həzrət İsmayil (ə) qoyunlarını Fəratın ətrafında otladırmış və ona xəbər verirlər ki, qoyunları bir neçə gündür ki, həmin yerdən su içmirlər. Ona vəhy olur ki, bu məsələnin səbəbini qoyunlardan soruşsun. O, da qoyunlardan soruşanda onlar deyirlər ki, bu həmin yerdir ki, İmam Hüseyn (ə) burada şəhid olacaqdır və biz də bu müsibətə qəmgin olduğumuz üçün su içmirik. Həzrət İsmayil (ə) İmamın qatillərini lənətləyir və onun üçün göz yaşı tökür.

/Erfan/Deyerler/