Xəbər verdiyimiz kimi dünən Kərbəla şəhərində İmam Hüseyn məqbərəsinin üzərində dalğalanan bayrağın dəyişdirilmə mərasimi olub və mərasimi canlı olaraq minlərlə insan izləyib.

Kerbela.info Imamhussain.org-a istinadla xəbər verir ki, mərasimdə İmam Hüseyn ziyarətgah kompleksinin baş katibi Şeyx Əbdülmehdi əl-Kərbəlayinin müraciəti səsləndirilib. Ziyarətgahın baş katibinin köməkçisi Seyid Əfzəl əş-Şami ziyarətgah rəhbərliyinin müraciətini iştirakçılar üçün oxuyub.

Müraciətdə düşmənlərin qarşısında yorulmadan reformasiya və inkişaf yolunda davamlı addımlamağın zəruriliyi vurğulanıb. "İmam Hüseynin (ə) müqəddəs amalı uğrunda fədakarlıq edirsinizsə, bu yolda gərək dininizi və birliyinizi qoruyasınız. Mübarizə aparırsınızsa, səbrli olun, çünki fədakarlığınızın əvəzi olacaq, necə ki, İŞİD-ə qarşı göstərdiyiniz fədakarlıq öz bəhrəsini verdi", - müraciət mətnində qeyd olunub.

Şeyx Əbdülmehdi Kərbəlayinin müraciətində, həmçinin vurğulanıb: "İmam Hüseynin (ə) müsibətinə görə niyə ağlamayaq? Halbuki İmam Hüseyn (ə) hələ yaradılmamış həzrət Adəm (ə) onun üçün ağlamışdı".

Şeyx Kərbəlayi həzrət Xanım Zeynəbi (ə) xatırlamağın dəyərinə də toxunub, bu əzəmətli qadının Kərbəla meydanında göstərmiş olduğu qəhrəmanlığı və fədakarlığı tərənnüm edib.

Ziyarətgah rəhbərliyinin müraciətində İmam Hüseyn (ə) dəyərlərinin qorunması uğrunda fədakarlıq göstərənlərə minnətdarlıq edilib, möminlərə öz dinlərini, ibadətlərini, birliklərini qorumaq tövsiyə olunub, uşaq tərbiyəsinə və qadınların iffətli olmasına xüsusi diqqət yetirilməsi tapşırılıb.