Məhərrəm ayının başlanması ilə əlaqədar müqəddəs Kərbəla şəhərində zəvvarlar üçün çoxlu sayda pulsuz xidmət köşkləri quraşdırılıb. Bununla əzadarlıq günləri boyunca Kərbəla şəhərinə təşrif gətirən zəvvarlara pulsuz xidmət göstərilməsi və onların rahatlığı nəzərdə tutulur.

Kerbela.info Imamhussain.org-a istinadən xəbər verir ki, bu barədə İmam Hüseyn və Həzrət Əbəlfəzl Abbas ziyarətgahlarının zəvvar qrupları ilə iş və mərasimlər departamentinin direktor köməkçisi Mazin əl-Vəzni müsahibəsində bildirib. Onun sözlərinə görə, yaxınlaşmaqda olan kütləvi zəvvar axını ilə əlaqədar əlavə olaraq 1500 xidmət qrupu və pulsuz xidmət köşkləri qeydiyyatdan keçib.

"Kərbəla Polis Departamenti ilə əməkdaşlıq çərçivəsində şəhərdə təhlükəsizliyi təmin etmək məqsədilə bütün xidmət qruplarının və xidmət köşklərinin qeydiyyatının polis idarəsində həyata keçirilməsini təmin etmək üzrə xüsusi plan hazırlanıb", - deyə əl-Vəzni əlavə edib.

O, həmçinin bildirib ki, pulsuz xidmət köşkləri və xidmət qrupları üçün xüsusi yerlər ayrılıb, beləcə zəvvarların izdihamı artan ərəfələrdə onlar üçün çətinlik yaranmayacaq. Zəvvar qrupları ilə iş və mərasimlər departamenti, həmçinin xidmət qrupları üçün xüsusi cədvəl tərtib edib və bu cədvəl əsasında qruplar hissə-hissə İmam Hüseyn və Əbəlfəzl hərəmlərinə daxil ola biləcəklər.