Hər il olduğu kimi bu il də dünyanın müxtəlif ölkələrində “İmam Hüseynin (ə) südəmər körpələri” başlıqlı tədbirlər keçirilir.

Kerbela.info "TasnimNews"-a istinadla xəbər verir ki, bu mərasimlər dünyanın beş qitəsində məhərrəm ayının ilk cümə günündə təşkil edilir. Bu il dünyanın müxtəlif ölkələrində 4 mindən çox tədbir keçirilib.

Bu mərasimlərdə minlərlə südəmər körpə hüseyniyyələr və məscidlərə gətirilərək Kərbəlada şəhid edilmiş İmam Hüseynin (ə) 6 aylıq südəmər körpəsinin xatirəsinə onunla səs-səsə verir, analar öz laylaları ilə Həzrət Əli Əsğərin anası Rübabın kədərinə şərik olurlar.

Bildirək ki, “İmam Hüseynin (ə) südəmər körpələri” adlı konfrans 2003-cü ildən Tehranda keçirilməyə başlanıb. Konfransın əsas mövzuları Aşura reallıqlarını çatdırmaq və Həzrət Əli Əsğərin şəhidliyini anlatmaqdır. Bu tədbirlər Əhli-beyt sevərlər tərəfindən böyük rəğbətlə qarşılanıb. Belə ki, artıq 15 ilə yaxındır bu mərasimlər İranla yanaşı dünyanın 41 ölkəsində, o cümlədən Azərbaycan, Britaniya, Rusiya, Almaniya, Filippin, İndoneziya, Yəmən, Tacikistan, Myanma, Sinqapur, Ukrayna, Kəşmir, Livan, Banqladeş, Malayzia, Tayland , Türkiyə, İraq və digər ölkələrdə keçirilir.