İmam Hüseyn ziyarətgahının şəhid və veteran ailələrinə qayğı departamenti Babil əyalətində Xalq Könüllüləri Cəbhəsinin (Həşdi-Şabi) şəhid olmuş üzvlərinin övladları üçün məktəb ləvazimatları paylanması işini yekunlaşdırıb.

Kerbela.info Imamhussain.org-a istinadla xəbər verir ki, bu barədə ziyarətgahın ictimaiyyətlə əlaqələr departamenti məlumat yayıb. Qurumun təmsilçisi İmad Qeşmi bildirib ki, yardım kampaniyası İraqın müdafiəsi uğrunda şəhid olmuş şəxslərin övladlarından 60 şagirdə şamil olunub.

İmam Hüseyn ziyarətgahı oxşar təşəbbüsü Bəsrə, Zi-Qar və Meysən əyalətlərində də həyata keçirib. Kampaniya zamanı ziyarətgah nümayəndələri şəxsən şəhid ailələrinə baş çəkir, onların problemləri ilə maraqlanır və hədiyyələri təqdim edirlər.

Bildirək ki, müqəddəs ziyarətgah İraqda xeyli şəhid ailələrini, terrora qarşı mübarizədə yaralanmış şəxsləri himayə edir.