İmam Rza ziyarətgahının Müqəddəs Məkanlar və Zəvvarlarla İş Şöbəsinin müdir müavini bəyan edib ki, İranın Məşhəd şəhərində yerləşən müqəddəs ziyarətgahın bir qrup xidmətçisi Ərbəin zəvvarlarına xidmət göstərmək üçün Kərbəla şəhərinə və İran-İraq sərhədindəki Şələmçə rayonuna ezam olunub.

Kerbela.info Imamhussain.org-a istinadla xəbər verir ki, bu barədə İmam Rza ziyarətgahının rəsmi saytında məlumat dərc olunub. Seyid Xəlil Münabati bildirib ki, İmam Rzanın müqəddəs ziyarətgahının 30 əməkdaşı dünən səhər saatlarında Kərbəla və Şələmçə şəhərlərinə yollanıblar.
O qeyd edib ki, xidmətçilərin əsas heyəti artıq yola düşüb, digər qruplar isə tədricən sözügedən şəhərlərə yollanacaqlar.

"İmam Rza ziyarətgahı hər il olduğu kimi bu il də Şələmçə, Kərbəla, Kazimeyn və Samirrə şəhərlərinə dörd xidmət heyəti göndərəcək. İmam Əli ibn Musa Rzanın müqəddəs ziyarətgahının 200 əməkdaşı bu şəhərlərdə Ərbəin zəvvarlarına xidmət göstərəcək", - deyə X.Münabati əlavə edib.