Müqəddəs İmam Hüseyn ziyarətgahının mədəni və dini irsinin bərpası şöbəsi əvvəlki əsrlərdə Kərbəlada yaşayıb fəaliyyət göstərmiş İslam alimlərinin elmi irsinin aşkara çıxarılması və bərpası ilə bağlı görülmüş işlərin nəticəsini açıqlayıb.

Kerbela.info Imamhussain.org-a istinadla xəbər verir ki, layihə İslam irsinin dirçəldilməsi proqramı çərçivəsində həyata keçirilib.

Layihə çərçivəsində arxeoloji qazıntı və axtarış işləri aparılaraq şəhərin qədim alimlərinə məxsus əlyazmalar və əsərlər aşkara çıxarılır, daha sonra üzü köçürülərək yenidən nəşr edilir və ictimaiyyətə təqdim edilir.

Şöbənin administratoru İhsan Xudeyr Abbas bu səpkidə görülmüş işlərlə bağlı bildirib ki, indiyədək yaşı yüzlərlə il olan çoxlu sayda əlyazmalar aşkar edilib: "Qırx əlyazma işi aşkara çıxara bilmişik və bu əsərlər müqəddəs ziyarətgaha təhvil verilərək qorunur. Bu əlyazmaların on dördü Kərbəla alimlərinə məxsus ən nadir yazılardır".

Bildirək ki, aşkara çıxarılan əlyazma nüsxələri müxtəlif mərhələlərdən keçirilərək bərpa edilir. Orijinalın surətinin qorunması üçün əvvəlcə fotoqrafiya işləri aparılır, daha sonra nüsxələr toplanır, ardınca tədqiq və çap işləri görülür.