İmam Hüseyn ziyarətgahının nəzdində fəaliyyət göstərən "Varis əl-Ənbiya" Universiteti İspaniyada dərc olunan dünya universitetlərinin qlobal reytinqinə (vebometriks) daxil olduğunu açıqlayıb.

Kerbela.info Imamhussain.org-a istinadla xəbər verir ki, bu barədə universitetin vitse-prezidenti doktor Abbas əl-Dami bildirib. Onun sözlərinə görə, bu nailiyyətin əldə edilməsində İmam Hüseyn ziyarətgahının baş katibliyinin və universitetin prezidenti doktor Tələb Həsən Musanın xüsusi rolu var.

"Bu nailiyyətimiz göstərdiyimiz böyük cəhdlərin və peşəkar müəllim kollegiyamızın zəhmətləri hesabına əldə edilib. Müəllimlərimiz universitetimizin elmi səviyyəsini ən yüksək pilləyə qaldırmaq üçün böyük zəhmət çəkiblər", - deyə vitse-prezident bildirib.

Bildirək ki, dünya universitetlərinin vebometriks reytinqi veb səhifələrdə dərc olunan materialların həcmi, bu materialların onlayn formada əlçatanlığı və təsiri baxımından müəyyənləşdirilir. Reytinqin formalaşmasına, həmçinin xarici səhifələrdə universitet materiallarına edilmiş onlayn istinadlar da əhəmiyyətli təsir göstərir.

Hər il açıqlanan reytinq siyahısı "Cybermetrics Lab" təşkilatı tərəfindən dərc edilir. Təşkilat İspaniya Milli Tədqiqat Şurasına daxildir.