Müqəddəs Kərbəla şəhərində İmam Hüseyn və həzrət Abbas ziyarətgahlarının arasındakı meydanda dünyanın ən böyük uşaq sərgilərindən biri təşkil ediləcək.

Kerbela.info Imamhussain.org-a istinadla xəbər verir ki, bu barədə İmam Hüseyn ziyarətgahının uşaqlara qayğı və inkişaf departamenti məlumat yayıb.

Bildirilib ki, Dördüncü Uşaq Sərgisinin açılışı fevral ayının 20-də baş tutacaq. Departamentin sədri Məhəmməd əl-Həsnavinin sözlərinə görə, sərgidə ABŞ, Böyük Britaniya, Livan, Misir, İordaniya və Küveytdən olan çoxlu kitab mağazaları və nəşriyyat evləri iştirak edəcək.

"Bu sərgini təşkil etməkdə məqsədimiz uşaqların düşüncə səviyyəsini inkişaf etdirməkdir. Onları yanlış fikirlər və vərdişlərdən uzaqlaşdırmaq, kitab oxumağa həvəsləndirmək sərginin əsas motivlərindəndir. Çünki bir çox valideynlər övladlarının mobil telefon və planşetlərdən yalnış tərzdə istifadə etmələrindən narahatlıq duyur. Bu cür uşaqlar hər gün saatlarla əyləncə qurğularına vaxt sərf edirlər. Biz istəyirik ki, onlara kitab oxumaq vərdişlərini aşılayaq", - deyə M.Həsnavi əlavə edib.