İraqın Kərbəla şəhərində İmam Hüseyn ziyarətgahının uşaqlara qayğı və inkişaf departamentinin təşkilatçılığı ilə Beşinci Beynəlxalq Gənc Hüseynçilər Uşaq Teatr Festivalının açılışı olub.

Kerbela.info Imamhussain.org-a istinadla xəbər verir ki, festivalda İraq, Suriya, Tunis və Belçika teatr truppalarının təqdimatında azı doqquz tamaşa nümayişə qoyulub. Tamaşalar əsasən 5 yaşdan aşağı və 6-10 yaş aralığındakı uşaqlar üçün nəzərdə tutulub.

Departamentin sədri Məhəmməd Həsnavinin bildirdiyinə görə, builki festivalın şüarı xərçəng xəstəliyi diaqnozu qoyulmuş uşaqları dəstəkləmək üçün "Xərçəngə qarşı vuruşanlar" olub.

"Festival təkcə teatr tamaşalarından ibarət deyil, belə ki, teatr atelyeləri, kuklaların hazırlanma nümayişi və kloun atelyeləri kimi digər fəaliyyətlər də təşkil edilib", - deyə Həsnavi qeyd edib.

İraqın tanınmış aktyoru və rejissoru Mazin Mustafanın sözlərinə görə, İmam Hüseyn ziyarətgahı beynəxalq səviyyəli mədəni festivalların təşkilində olduqca aktiv iştirak edir. Bunlardan beynəlxalq teatr festivalı, beynəlxalq film festivalını göstərmək olar.

O qeyd edib ki, bu festivalın İraqın digər şəhər və əyalətlərində də keçirilməsilə bağlı İmam Hüseyn ziyarətgahına təklif irəli sürülüb. Bununla daha çox iraqlı uşaq tamaşalara və sərgilərə baxa biləcəklər.

Bildirək ki, Beşinci Beynəlxalq Gənc Hüseynçilər Uşaq Teatr Festivalı Kərbəla şəhərindəki Mədəniyyət sarayında keçirilir və dörd gün davam edəcək. Festivala daxil olmaq hər kəs üçün pulsuzdur.