Dünən İmam Hüseynin (ə) mövlud günü münasibətilə həzrətin müqəddəs məqbərəsində Quran gecəsi keçirilib, beynəlxalq dərəcəli qarelər Qurani-Kərimdən ayələr tilavət ediblər.

Kerbela.info İmamhussain.org-a istinadla xəbər verir ki, İmam Hüseyn və həzrət Abbas ziyarətgahlarının rəhbərliyi tərəfindən 15-ci Mədəniyyət Baharı Beynəlxalq Festivalı çərçivəsində həzrət İmam Hüseyn və qardaşı həzrət Əbəlfəzl-Abbasın mövlud günləri münasibətilə bayram mərasimi keçirilib.

Mövlud mərasimi İmam Hüseyn ziyarətgahının nümayəndəsi, beynəlxalq dərəcəli Quran qaresi Üsamə Kərbəlayinin mübarək ayələrdən tilavət etməsilə başlanıb. Daha sonra ziyarətgahın nəzdindəki Quran Evinin əl-Bəraim qrupu müqəddəs kitabdan ayələr tilavət edib. İmam Hüseyn ziyarətgahının digər bir qaresi Hamid Şakir Nejad da tilavət gecəsində Quran oxuyub.

"Müqəddəs ziyarətgahın nəzdindəki Quran Evi hər il Mədəniyyət Baharı Beynəlxalq Festivalı çərçivəsində İmam Hüseynin mövludu münasibətilə Quran gecəsi təşkil edir. Mərasimdə İraqın və dünyanın ən yaxşı qareləri iştirak edərək müqəddəs kitabdan ayələr tilavət edirlər. Bu tədbirdə, həmçinin Quran Evinin üzvü olan gənc istedadlar da tilavət bacarıqlarını nümayiş etdirirlər", - deyə ziyarətgahın nümayəndəsi Səfa əl-Silavi jurnalistlərə müsahibəsində deyib.