İmam Hüseyn (ə) ziyarətgahının rəhbərliyi İraqın Fransadakı fövqəladə və səlahiyyətli səfirini qəbul edib. Ziyarətgah kompleksinin direktoru Şeyx Əbdülkərim əl-Kərbəlayi Kərbəla şəhərində səfir Heydər əş-Şəmrəti ilə görüşüb.

Görüş zamanı Şeyx Kərbəlayi Paris şəhərində mədəni və media tədbirlərinin keçirilməsi zamanı İraq səfirliyinin dəstəyini yüksək qiymətləndirib. "Biz İmam Hüseynin (ə) insani prinsiplərini nümayiş etdirməliyik və bu məqsədlə dünyanın müxtəlif paytaxtlarında hər birinə uyğun tərzdə tədbirlər keçirməliyik", - deyə ziyarətgah məsuli qeyd edib.

Səfir əş-Şəmrəti isə vurğulayıb ki, onun İmam Hüseyn (ə) hərəminə ziyarəti İslam ideologiyasının, Əhli-beyt prinsiplərinin və müqəddəs Kərbəla şəhərinin tarixinin təbliğ edilməsi istiqamətində ziyarətgah kompleksi ilə əməkdaşlıq üçün yeni imkanların açılmasına xidmət edəcək.

Səfirin sözlərinə görə, İraqın böyük və qədim tarixə malik mədəniyyəti dünyada təbliğ edilməlidir, xüsusilə Paris kimi şəhərlərdə bu təbliğat daha ciddi aparılmalıdır, çünki burada mədəniyyətə, təhsilə və dünyagörüşə böyük diqqət ayırılır.
Diplomat, həmçinin diqqətə çatdırıb ki, YUNESKO səfirlərinin müqəddəs Kərbəla şəhərinə dəvət edilməsi ilə bağlı birgə plan mövcuddur. Bundan əlavə İmam Hüseyn (ə) ziyarətgahını təmsil edən nümayəndə heyətinin intellektual və mədəni mübadilə çərçivəsində YUNESKO baş ofisinə ezam edilməsi də nəzərdə tutulur.

Imamhussain.org/Kerbela.info