Məhəmməd ibn Müslim İmam Baqirdən (ə) belə nəql edir: "Şiələrimizə göstəriş verin ki, İmam Hüseynin (ə) qəbrini ziyarət etsinlər. Çünki onun imamətini təsdiqləyən hər bir mömin üçün bu ziyarət vacibdir." ("Kamiluz-ziyarat", 121; "Cameul-əxbar", 23)

İmam Sadiq (ə) buyurur: "Allah Onun yolunda Hüseyni (ə) ziyarət edəni cəhənnəm odundan qurtarar, böyük qorxu günü ona aman verər. Hüseyni (ə) ziyarət edən dünya və axirətdə nə istəsə Allah ona əta edər." ("Kamiluz-ziyarat", 145, bab 54, hədis 7)

İmam başqa bir məqamda buyurur: "Hüseyni (ə) ziyarət etmədən dünyasını dəyişən din və iman baxımından nöqsanlıdır. Belə bir şəxs behiştə daxil olsa, dərəcəsi bütün iman əhlindən aşağı olar." ("Kamiluz-ziyarat", 193, bab 78, hədis 2)

İmam Rza (ə) buyurur: "Kərbəlada Hüseynin (ə) qəbrini ziyarət edən insan sanki ərşin fövqündə Allahı ziyarət etmişdir." ("Səvabibul-əmal və iqabul-əmal", 85)