Cumhuriyyətin qurucusu Məhəmmədəmin Rəsulzadənin 14 noyabr 1914-cü il "İqbal" qəzetində (Nəşr 790) yayımlanan Aşura məqaləsindən və 1918-ci ildə "Açıq Söz" qəzetinə verdiyi "Əza günləri" adlı müsahibədən qısa çıxarışlar.

• İmam Hüseyn inandığı və etiqad etdiyi fikirin uğrunda ölməyənə qədər, özünün əbədi bir rəhmətə nail ola bilməyəcəyini göstərdi.

• İmam Hüsey əqidə və din şəhididir. Belə bir şəxsiyyət biz müsəlmanlara örnək və öndər olmalıdır.

• İmam Hüseyn ölümünə razı olur, amma beyət etməyə yox. Cismən ölür, amma ruhən yaşadığını isbat edir. Neynəva məzlumu heç də məğlub deyildir, qalibiyyətin zirvəsinə nail olmuş mücahiddir.

• Kərbəla hadisəsini, Əhli-beytin oradakı məzlumluğunu çox eşitmişik, ancaq bu məsələdə ən az işlətdiyimiz bir şey var: Ağıl. Bu kimi ictimai-siyasi hadisələrdən səmərəli nəticələr almaq üçün duyğularımızdan çox ağlımızı işə salmalıyıq.

• Hüseyni məzlum bilib halına ağlaya-ağlaya hər bir müsibətdə ancaq ağlamağı öyrənmişik, onun yolunu getməyi xəyal belə etmirik. Bəlkə bu hal Kərbəla şəhidini qəbrində də rahatsız etməkdədir.

• Ey əzadarlar! Məhərrəm ayında bir az özünüzü toxdadıb keçən illərə baxın. Orada Kərbəlaya bənzər bir çox hadisələr görəcəksiniz. Bu hadisələr haqda da düşünün, onlar da sizin diqqətinizi cəlb etsin!

Kerbela.info