Qoyun qılım namazımı
Sonra kəsin boğazımı
Qonağızam vəfalıyam
Yaralıyam, yaralıyam

Su yoxdu dəstəmaz alam,
Üz üstə səcdədə qalam
Ölüb əzan deyən balam,
Cigər yanır əzalıyam

Bəla çölün duman tutub,
Bu gülşəni xəzan tutub
İki gözümü qan tutub,
Görürsüz ibtilalıyam

Çü dadü-kinə əkmiyin,
Cinayətə tələsmiyin
Başımı teşnə kəsmiyin,
Ki başı macəralıyam

Məni qoşun nədən vurar,
Ərazili zəman vurar
Gələn vurar gedən vurar,
Solan gülün misalıyam

Çıxıb kamani kinədən,
Dəyibdi ox bu sinədən
Əl üzmüşəm Mədinədən,
Həmişə Kərbəlalıyam

Mən aşiqi şəhadətəm,
Əmiri-mülkü-vəhdətəm
Fədayi-rahi-izzətəm,
Bir aşiqin cəlalıyam

Köməklərim batıb qana,
Düşüb hərəsi bir yana
Sızıldaram yana-yana,
Ki ney kimi nəvalıyam

Gəlib qan ağlıyan bacım,
O sinə dağlayan bacım
Gözümü bağlayan bacım,
Deyir başı bəlalıyam

Kimim qalıb ki yar ola,
Dönəmmirəm sağa-sola
Balalarım baxır yola,
Ruqəyyədən aralıyam