Ruhu təlim eləyən məktəbi - irfandı Hüseyn,
Fələki - mərifətə mehri - dirəxşandı Hüseyn.

Kərbəladə nə murad etsə idi hasil idi,
Ətəşindən degil, insanlıq üçün yandı Hüseyn.

Elə zənn eyləmə sən, getdi Hüseynin dövrü,
Qəsəm Allahə ki, hər dövrdə sultandı Hüseyn.

"O ki, bir adi ərəbdir" deyənə vay olsun,
Ürəyi daş nə bilir hüccəti - Sübhandı Hüseyn.

Sözünü dərk qılan mərifətullahı tapar,
Qəlbi sirab eləyən çeşmeyi - imandı Hüseyn.

Müşkülün həll olar ol şahə təvəssüllə, könül,
Sahibi - fəzlu kərəm, mənbeyi - ehsandı Hüseyn.

Əmriya, vəsfinə acizdi dil ol Mövlanın,
Şeirə tərifi sığışmaz, böyük insandı Hüseyn.

Ağasəlim Əmri