Mənəm aşiqi-İmamət, Hüseyn İmamət deməkdir!
Hüseyn Məhşəri-əlamət, Hüseyn Qiyamət deməkdir!
Hüseyn Ali-Muhəmməddir, Hüseyn Əhli-Beyt zinəti!
Hüseyn məqami-Cənnətdir, Hüseyn Peyğəmbər itrəti!
Hüseyndir məscidi-mehrab, Hüseyn şeşguşeyi-ehram!
Hüseyn Zəhraya afitab, Hüseyn Əliyə ehtiram!
Hüseyn tilavəti-Quran, Hüseyn sureyi-ər-Rəhman!
Hüseyndir büsbütün iman, Hüseyndir ərşi-Asiman!
Hüseyn vadiyi-Ərafat, Hüseyn Məkkeyi-mükərrəm!
Hüseyndir külli-kainat, Hüseyndir çeşmeyi-Zəm-zəm!
Hüseyn məlum beş vaxt namaz, çün adı Lövhi-məhfuzda!
Hüseynin nuruna çatmaz göydə ən parlaq ulduz da!
Hüseyn İlahi əmridir – əqimüs-sələt yavəri!
Hüseyn rükudur, səcdədir, Hüseyn ibadət sərvəri!
Hüseyndir cümlə-nəcabət, Hüseyndir həqqi-ədalət!
Hüseyndir dünyaya rəhmət, Hüseyndir Bərzəx, Axirət!
Hüseyn sədaqət, mərhəmət, Hüseyn inayət deməkdir!
Hüseyn müqəddəs əmanət, Hüseyn hidayət deməkdir!
Hüseyn mərdlik, mərdanəlik, Hüseyn qeyrət, cəsarətdir!
Hüseyndir ərlik, ərənlik, Hüseyn şücaət deməkdir!
Hüseyn daim ürəklərdə, hər kəlmə, bəstə, əsərdə!
Hüseyn Həşr-hesab günü şəfaət edər Kövsərdə!
Hüseyn azadlığın özü, Hüseyn insanlıq zirvəsi!
Hüseyndir məsumun sözü, Hüseyndir məzlumun səsi!
Hüseyn Abbas, Hüseyn Qasim, Hüseyn Əliyyi-Əkbərdir!
Hüseyndir dəstəmaz, Yasin, Hüseyn Əliyyi-Əsğərdir!
Hüseyn çıxan axşam ayı, Hüseyn səhər günəşidir!
Hüseyn Haqqın qurban payı, qurban başı, gül nəşidir!
Hüseyndir mahi-Məhərrəm, Hüseyndir Aşura, matəm!
Hüseyn pərçəm, Hüseyn ələm, Hüseyndir kürreyi-aləm!
Hüseyn susuz dodaqların su niskili, su həsrəti!
Hüseyn teşnələb qazanan dərəceyi-şəhadəti!
Əhli-iman, Hüseyn rəhbər, Hüseyn pənci-Ali-əba!
Hüseyndir İslama öndər, Hüseyndir şahi-Kərbəla!

Əhliman Rüstəmov