Xətmi Peyğəmbərə Quranda gəlib böylə nida

Mən sudan xəlq elədim aləmi söylibdi Xuda

Ol səbəbdəndi ki, su tinədidir dünyanın

Ta əzəldən bu yana zinətidir dünyanın

Rəngi yox, hiyləsi yox, yəni ki, mütləq, şəffaf

Ona bir rəngi qatarsansa əgər oldu müzaf

Sudu Fironu edən qərq, qılan qətli həyat

Su verib həzrət Musaya çətin anda nicat

Son qoyur gahi görürsən elə bir müşkülə su

Gahi yandırmaq ilə döndərib qəlbi külə su

Elə varlıqdı ki su kim onu idrak eliyər

Mənəviyyatını cisminnən əzəl pak eliyər

Necə dünyada su tək pak eliyən zat vardır

Əhli-Beytdə bəşərə paklıq üçün meyardır

Cismi su pak eliyir, Əhli-Beytsə canı

Yalnız onlardır edən cismi cani nurani

Suyun haqqında bunu söyləsəm ancaq bəs edir

Həzrəti Fatimənin dəhridə mehriyyəsidir

Dağda, çaylarda, dənizlərdə gəlibdir dilə su

Bu fəxarətdən elə coşmadadır fəxrilə su

Su cəmadatdı dili yoxdu ki, desin səninəm

Kimə dostam diyə yaxud da deyə düşməninəm

Bir axar su qabağın kəssən o əlbət duracaq

Qəlbin olsa duyacaqsan ki, nə cür qışqıracaq

"Haqqımı zay eləmə, gəl məni çatdır yiyəmə"

Nəhri əlqəm o zaman batmış idi böylə qəmə

Su kənarında susundan yananın halına bax

Su qabağın kəsib həqqi dananın halına bax

Nə oleydi kimə aiddisə həqqin bilə su

Az qalıb zülmün əlindən belə qalxsın zilə su

Bu sudan xəlq olunan dəhr özü viran qalsın

Az qalıb çəxri-fələk bu işə heyran qalsın

Fikr elə bir su ki məhriyyəyi Zəhra olsun

Gül tək övladları amma ki ətəşdən solsun

Bir kiçik qız baxır həsrətlə səqqaya tərəf

Utanır baxmayır Abbas Rüqəyyaya tərəf

Çün başı nizədədir ox da vurublar gözünə

Utanır ondan ötrü ki, əməl etməyib sözünə

Yetirə bilməyib ətəşdən quruyan bir gülə su

Halbuki bəs edərdi o gülə bir gilə su

Xeymələrdən gələn əfqanə Əbəlfəz dözməz

Sudan ötrü batar al qanə Əbəlfəz dözməz

Razıdır qəsdinə şəmşir ilə hamı duralar

Kəsələr qollarını, həm gözünə ox vuralar

Məşqi ağzında tutar amma gələr əslində

Ona yox məşqinə ox dəysə ölər əslində

Necə bir qeyrətə malikdir o mövla görəsən

Yetişən vəxti suya neynədi səqqa görəsən

Doldurub ovcunu suyla gətiribdir ələ su

Baxdı bir xeyli suya vurmadı amma dilə su

Bu necə zülmdü ya Rəbb, nə müsibətdir bu?

Altı aylıq Əli-Əsğərdən ötrü yoxdur su?!

Axıri mənzilidir şahi şəhidan qucağı

Çat-çat olmuş ətəşindən quruyub dil-dodağı

İsti səhra və susuz körpə ola haləti yox

Ağlamır, ağlamağa canda belə taqəti yox

Körpə oxlandı və az ömrü yetişdi tamama

Diksinib açdı gözün sanki deyirdi imama:

"Daha su istəmirəm qanə dönəydi belə su

Məni qaytar anama verdi mənə Hərmələ su"

Zülm olunmuş o kəsə, kim ki həqin talibidir

Su verilmib o kəsə kim ki suyun sahibidir

Yari ənsarini həqq uğruna qurban verdi

Özü canani yolunda elə bir can verdi

Hələ tarix gözü görməyib belə bir qurbani

Hələ çərxin özü görmibdi belə qurbanı

Canını verdi fəda şahi şəhidan o zaman

Ta bu qəflətdə yatan ümmətə əmr etti, oyan!

Kərbəladan coşa dünyaya sala vəlvələ su

Kimsənin bəlkə yana qəlbi, gözündən gələ su

Bu nahaq qanlar İlahi qalacaqmı yerdə?

Nə zaman çəkilər haqqın üzündən bəs pərdə?

Gözləri yolda qalanlar nə qədər gözləycək?

Daha qeyrətli olanlar nə təhər gözləyəcək?

Yenə bu ümmət o zalimliyə biganə qalır

Yox ədalətdən əsər həqq yenə əfsanə qalır

Yan keçib daş yenə mənnən dəyəcək qardaşıma

Nə rəvadır sevinim mənsə səlamət başıma

Azəra ağlayaraq qəlbivə daim çilə su

Ora düşmüş ləkəni bəlkə bu yolla silə su

Axund Azər Sani